Şahbuz rayonunda baş verən ağır yol-nəqliyyat hadisəsi nəticəsində 3 nəfər həyatını itirib, 9 nəfər isə xəsarət alıb.

Abatv.az xəbər verir ki, hadisə rayonun Gömür kəndində, dağlıq ərazidə qeydə alınıb.

Məlumata görə, hərəkətdə olan “Toyota Prado” markalı, 68-BE-050 dövlət qeydiyyat nişanlı avtomobil idarəetmədən çıxaraq aşıb.

Qəza nəticəsində Şərur rayonunun Oğlanqala kənd sakinləri – 1975-ci il təvəllüdlü Nazim Abdullayev, onun 2017-ci il təvəllüdlü qızı F. Abdullayeva və 2006-cı il təvəllüdlü Pərvin Şıxəliyev həlak olublar.

Hadisə zamanı daha 9 nəfər xəsarət alıb. Yaralılar arasında 2025-ci il təvəllüdlü üç körpə, azyaşlılar, qadınlar və orta yaşlı kişi də var.

Xəsarət alanlar Naxçıvan Muxtar Respublikası Mərkəzi Xəstəxanasına çatdırılıblar.

Xəstəxananın həkimi Nurlan Cəfərovun sözlərinə görə, yaralılar saat 21 radələrində tibb müəssisəsinə yerləşdiriliblər. Onlardan 3-ü körpə, 5-i qadın, 1-i isə orta yaşlı kişidir. İki yaralının vəziyyəti ağır, digər şəxslərin vəziyyəti isə orta ağır qiymətləndirilir.

Hazırda yaralıların müalicəsi stasionar şəraitdə davam etdirilir.

Hadisə yerinə hüquq-mühafizə orqanlarının əməkdaşları cəlb olunub. Faktla bağlı araşdırma aparılır.