UEFA Çempionlar Liqasının II təsnifat mərhələsinin ilk oyununda Azərbaycanın təmsilçisi "Sabah" doğma meydanda Finlandiyanın "KuPS" komandası ilə üz-üzə gəlib.

"Bank Respublika Arena"da keçirilən qarşılaşma Bakı klubunun 1:0 hesablı qələbəsi ilə başa çatıb.

Matçın taleyini həll edən yeganə qolu ilk hissəyə əlavə olunmuş vaxtın birinci dəqiqəsində (45+1) monteneqrolu yarımmüdafiəçi Velko Simiç vurub. Təcrübəli futbolçu komandasına vacib üstünlük qazandıraraq "Sabah"ın cavab görüşü öncəsi üstün mövqedə olmasını təmin edib.

Görüş ərzində hər iki komanda qol imkanları yaratsa da, hesab dəyişməyib və təmsilçimiz meydanı minimal hesablı qələbə ilə tərk edib.

"Sabah"ın start heyətində Stas Pokatilov, Stiv Solve, Rəhman Daşdəmirov, Umarali Raxmonaliyev, Aleksey İsayev, İvan Lepinitsa, Kahim Perris, Coy-Lens Mikels, Velko Simiç, Timoteuş Puxaç və Akim Zedadka yer alıblar. Komandaya litvalı mütəxəssis Valdas Dambrauskas rəhbərlik edib.

Qeyd edək ki, komandalar arasında cavab qarşılaşması 28 iyul tarixində Finlandiyada keçiriləcək. Bu cütün qalibi UEFA Çempionlar Liqasının III təsnifat mərhələsində Danimarkanın "Orxus" və Polşanın "Lex" komandaları arasında keçiriləcək cütün qalibi ilə üz-üzə gələcək.

Xatırladaq ki, "Sabah" I təsnifat mərhələsində Uelsin TNS klubunu iki oyunun nəticəsinə əsasən 4:1 hesabı ilə məğlub edərək növbəti mərhələyə yüksəlmişdi.