Beynəlxalq Futbol Federasiyasının (FIFA) keçmiş prezidenti Yozef Blatter təşkilatın gələcək rəhbəri kimi Norveç Futbol Assosiasiyasının prezidenti Liza Klavenessin namizədliyini dəstəklədiyini açıqlayıb.

Abatv.az xəbər verir ki, Blatter bununla bağlı sosial şəbəkə hesabında paylaşım edib.

O, Liza Klavenessin uzun illər futbolun inkişafına verdiyi töhfələri və prinsipial mövqeyi ilə seçildiyini vurğulayıb.

"Liza Klaveness ən yüksək hörmətə layiqdir. O, yeganə insandır ki, həmişə aydın mövqe tutub və axın istiqamətində getməyib. FIFA üçün vaxt çatıb ki, təşkilata qadın rəhbərlik etsin", - deyə Blatter bildirib.

Qeyd edək ki, 45 yaşlı Liza Klaveness Norveç milli komandasının sabiq futbolçusudur. O, 2022-ci ildə Norveç Futbol Assosiasiyasının (NFF) prezidenti seçilərək ölkə futbolunun idarə olunmasında mühüm rol oynamağa başlayıb.

Hazırda FIFA-ya 2016-cı ilin fevral ayından etibarən Canni İnfantino rəhbərlik edir. O, korrupsiya qalmaqalları səbəbindən vəzifəsini tərk edən Yozef Blatteri əvəz etmişdi.

Məlumata görə, FIFA-nın növbəti prezident seçkiləri 2027-ci ilin mart ayında Mərakeşdə keçiriləcək. Seçkilər ərəfəsində Liza Klavenessin namizədliyinin irəli sürülməsi dünya futbol ictimaiyyətində maraqla qarşılanıb. Əgər o seçilərsə, FIFA tarixində quruma rəhbərlik edən ilk qadın prezident olacaq.