“Qarabağ”ın braziliyalı yarımmüdafiəçisi Kadi Borges 1 oyunu şərti olmaqla 3 oyunluq cəzalandırılıb.

Abatv.az xəbər verir ki, bu barədə AFFA İntizam Komitəsinin keçirilən iclasında qərar qəbul edilib.

Qərara əsasən, Kadi Borges Misli Premyer Liqasının III turunda “Sumqayıt”la qarşılaşmanın 31-ci dəqiqəsində təcavüzkar davranışa görə birbaşa qırmızı vərəqə alması səbəbindən 3 oyunluq cəzaya məruz qalıb. Cəzanın 1 oyunu şərti hesab olunub. Futbolçuya 6 ay sınaq müddəti də təyin edilib.

Hadisə ilə əlaqədar “Qarabağ” klubu 3 000 manat məbləğində cərimələnib.

Eyni qarşılaşmada azarkeşlərin rəqib komandanın ünvanına kütləvi şəkildə təhqiramiz ifadələr səsləndirməsi də cəzasız qalmayıb. Buna görə “Sumqayıt” klubuna 5 000 manat cərimə tətbiq edilib.

İntizam Komitəsi III turun digər qarşılaşması olan “Zirə” – “Neftçi” oyunu ilə bağlı da qərarlar qəbul edib.

Matçın 70-ci dəqiqəsində ikinci sarı vərəqə alaraq meydandan kənarlaşdırılan “Neftçi”nin futbolçusu Elvin Bədəlov 1 oyunluq cəzalandırılıb. Paytaxt klubu bu səbəbdən 500 manat cərimə ödəyəcək.

Bundan əlavə, görüşün 80-ci dəqiqəsində “Neftçi” azarkeşlərinin meydançaya kənar əşya atması səbəbindən klub daha 2 000 manat məbləğində cərimələnib.

Beləliklə, AFFA İntizam Komitəsinin qərarları nəticəsində həm futbolçuların davranışlarına, həm də azarkeşlərin qayda pozuntularına görə klublara maliyyə və idman sanksiyaları tətbiq olunub.