İran İslam Respublikasının Kəşfiyyat Nazirliyinin Azərbaycan Televiziyasını (AzTV) "düşmən media qurumları" siyahısına daxil etməsi iki ölkə arasında media münasibətlərində yeni gərginlik yaradıb.

Abatv.az xəbər verir ki, bu barədə "Kaspi" qəzetində dərc olunan məqalədə bildirilir.

Məqalədə qeyd olunur ki, son bir ildə İranın regionda üzləşdiyi geosiyasi və hərbi proseslər fonunda qonşu dövlətlərlə münasibətlərində səmimiyyət nümayiş etdirmək imkanı yaransa da, Tehran Azərbaycana münasibətdə əks istiqamətdə addımlar atıb. Bildirilir ki, Azərbaycanın suverenliyinə qarşı yönəlmiş bəyanatlar, eləcə də İranın bəzi media qurumlarında ölkəmiz əleyhinə materialların yayılması münasibətlərə mənfi təsir göstərib.

Yazıda vurğulanır ki, 44 günlük Vətən müharibəsi dövründən başlayaraq İran mediasında Azərbaycana qarşı qərəzli mövqe müşahidə olunub. Həmçinin SEPAH-ın sərhədlər yaxınlığında keçirdiyi hərbi təlimlər və Azərbaycanın Naxçıvanla quru əlaqəsinin bərpası ilə bağlı mövqeyinə qarşı sərgilənən münasibət də buna nümunə kimi göstərilib.

 Məqalədə Azərbaycan mediasının isə beynəlxalq hadisələrin işıqlandırılması zamanı peşəkarlıq və obyektivlik nümayiş etdirdiyi qeyd olunur. Bildirilir ki, Azərbaycan dövləti İran media nümayəndələrinin ölkədə fəaliyyətinə və müxtəlif beynəlxalq tədbirlərdə iştirakına hər zaman şərait yaradıb.

İranın son addımına cavab olaraq Medianın İnkişafı Agentliyi (MEDİA) bəyanat yayıb. Bəyanatda İran Kəşfiyyat Nazirliyinin AzTV-ni "düşmən media qurumları" siyahısına daxil etməsi və həmin media ilə əməkdaşlıq edən şəxslərin cinayət məsuliyyəti ilə hədələnməsi pislənilib.

MEDİA bildirib ki, "Media haqqında" Azərbaycan Respublikası Qanununun 11.4-cü maddəsinə əsasən, Azərbaycan jurnalistlərinə başqa dövlət tərəfindən məhdudiyyət tətbiq olunarsa, qarşılıqlılıq prinsipi əsasında həmin dövlətin jurnalistlərinə də eyni məhdudiyyətlər tətbiq edilə bilər.

 Qurumun açıqlamasında qeyd olunub ki, bu prinsip nəzərə alınaraq Azərbaycanın milli maraqlarına zidd fəaliyyət göstərən İranın "Səhər" telekanalı və "Mehr" xəbər agentliyi, eləcə də həmin media qurumlarının nümayəndələrinin Azərbaycan ərazisində fəaliyyəti qanunsuz hesab edilir.

Məqalədə sonda vurğulanır ki, Azərbaycan hər zaman İranla mehriban qonşuluq və qarşılıqlı hörmət prinsiplərinə əsaslanan siyasət yürüdüb. Bununla yanaşı, ölkənin milli maraqlarına və suverenliyinə qarşı yönələn addımlara adekvat cavab vermək hüququnu da qətiyyətlə qoruyur.