Ağdam rayonunda son günlər baş verən yanğın hadisələri ilə bağlı aparılan araşdırmalar nəticəsində hadisəni törətməkdə şübhəli bilinən şəxs saxlanılıb.

Abatv.az xəbər verir ki, bu barədə Daxili İşlər Nazirliyinin (DİN) Mətbuat Xidmətinin regional qrupu məlumat yayıb.

Bildirilib ki, Ağdam rayonu ərazisində qeydə alınan yanğınların başvermə səbəblərinin müəyyən edilməsi məqsədilə polis əməkdaşları tərəfindən geniş araşdırma aparılıb.

Məlumata görə, istintaq çərçivəsində əraziyə qaldırılmış pilotsuz uçuş aparatı (PUA) vasitəsilə əldə olunan görüntülər və videomüşahidə kameralarının qeydləri təhlil edilib. Toplanmış materiallar əsasında Ağdam-Ağcabədi inzibati ərazilərinin kəsişməsində yerləşən əkin sahələrinin qəsdən yandırıldığı müəyyən olunub.

İlkin araşdırmalar zamanı yanğının 77-PT-225 dövlət qeydiyyat nişanlı "Niva" markalı avtomobili idarə edən 29 yaşlı Səbuhi Hüseynli tərəfindən törədilməsinə dair əsaslı şübhələr yarandığından həmin şəxs polis əməkdaşları tərəfindən saxlanılıb.

Faktla bağlı Cinayət Məcəlləsinin müvafiq maddəsi ilə cinayət işi başlanılıb. Hazırda Səbuhi Hüseynlinin təqsirləndirilən şəxs qismində istintaqa cəlb olunması, hadisənin bütün hallarının tam və hərtərəfli araşdırılması, eləcə də əmələ hüquqi qiymət verilməsi istiqamətində zəruri prosessual tədbirlər davam etdirilir.

Qeyd edək ki, hadisə ilə bağlı yayılan videogörüntülərdə yanğının başvermə anı əks olunub. Hüquq-mühafizə orqanları yanğınların baş vermə səbəblərinin tam araşdırılması və təqsirkar şəxslərin məsuliyyətə cəlb olunması istiqamətində tədbirləri davam etdirir.