Cəlilabad rayonunda 15 yaşlı qızla qeyri-rəsmi evlilik münasibətində olan 21 yaşlı şəxs azyaşlı ilə cinsi əlaqədə olmaqda təqsirli bilinərək həbs edilib.

Abatv.az xəbər verir ki, rayon sakini olan 21 yaşlı Vüqar Həmidovun (şərti ad və soyad) barəsində Cinayət Məcəlləsinin 152.1-ci maddəsi ilə cinayət işi açılıb.

İttihama əsasən, Vüqar Həmidov 14 yaşına çatmış, lakin 16 yaşına çatmamış şəxslə cinsi əlaqədə olub.

Məhkəmədə təqsirləndirilən şəxs bildirib ki, Mətanətlə (şərti ad) “Instagram” sosial şəbəkəsi vasitəsilə tanış olub. Daha sonra onların arasında münasibət yaranıb və Bakıda görüşüblər.

İş materiallarına əsasən, onların ilk intim münasibəti Cəlilabad rayonunun kəndlərindən birində baş verib. Bundan sonra tərəflər evlənmək qərarına gəliblər. Lakin qızın ailəsi onun yaşının az olması səbəbindən bu izdivaca razılıq verməyib.

Daha sonra Mətanətin Vüqara qoşularaq evdən getdiyi bildirilib. Qızın anası onların yaşadığı evə gəlsə də, qızını apara bilməyib. Sonradan ailələrin razılığı ilə Vüqargilin həyətində toy mərasimi keçirilib.

Hadisə ilə bağlı Vüqar Həmidov polis əməkdaşları tərəfindən saxlanılıb.

Məhkəmədə qızın anası təqsirləndirilən şəxsə qarşı şikayət və tələbinin olmadığını bildirib. Vüqarın anası isə Mətanət 18 yaşına çatdıqdan sonra rəsmi nikah bağlanacağını deyib.

Məhkəmənin qərarı ilə Vüqar Həmidov 1 il 3 ay müddətinə azadlıqdan məhrum edilib.